息魔帶挈 8207生意旺爆

1. 中央收緊銀根令不少企業百上加斤,但對做「大耳窿」生意的上海「安信兄弟」中國信貸(8207)而言,卻係天大的喜訊. 事關息魔絕對係佢好朋友,當民企借唔到錢,8207便可以吊高嚟賣,生意簡直做唔切. 現價1.33元,今年目標上望2元.

2. 8207去年11月以全配售方式在創業板上市，主要於上海提供三至六個月短期抵押借貸業務，抵押品以房地產為主,亦包括個人財產如珠寶鐘表. 由於中央限制銀行「放水」,不少財困企業只有向8207此類融資機構「撲水」.由於內地經濟長足發展,無論中央是否「制水」,未來之發展前景絕對係非常秀麗. 有香港經濟我哋睇,邦民、安信近年大灑銀彈狂谷廣告, 便知生意之利錢實在非常厚.

壞帳機會低

3. 無論做「大耳窿」, 還是「二叔公」,資本愈多,生意規模便可愈大.8207上市集資3.25 億元，其中2.5 億元將用於擴大短期融資業務和銷售網絡。集團旗下融通融資租賃獲批成立，待取得營業執照後，融通將以外商獨資企業形式，在上海及鄰近地區提供融資租賃服務，令政策風險有所降低。

4. 據悉，內地一些典當行的月息高達4至5 厘，即年息50、60 厘，而且對於抵押品的估值，由典當行決定，反映資金需求殷切。以8207招股書披露,房產做抵押之借款,不會超過市值之50%,即是說,當內地樓價跌五成,才出現壞帳.

純利率高達60%

5. 8207配股書預測2010的盈利約5,220萬人民幣，謙仔估計,其業績會beat the market，達6000萬元. 換言之,去年盈利將是2009年的4倍. 噴井式的增長,預料會隨著資金的壯大而得以保持. 有數得計,去年首七個月,8207生意額為5400萬元,但純利卻高達3100萬元,純利率高達六成,利錢之厚令人咋舌.

6. 謙仔假設，8207若將上市集資額的八成(即2.4億元)「放數」， 今年盈利可達1.5億元(即約1.7億港元),以股價1.33元計，預測PE 約13倍. 以一隻高增長兼喺港股暫為「獨家村」之股票嚟講,現價可算超筍.

7. 講完基本面,還可諗下陰謀論.首先, 大部分配售上市之gem股,上市後之成交會轉疏,但8207之成交卻保持在每日1000萬元之高水平,顯示幕後人肯揼水打turn(over),為未來之配股集資做定熱身,吸引基金大戶落場.

今年可轉主板

8. 其次, 當公布了去年業績後,8207便完全滿足了三年合計盈利超過六千萬元的轉主板條件,估計最今年底會成事,轉板將成為該股之炒作藉口.

9. 再者,全配售上市之股貨源極度歸邊,易升難大跌.上市四個月以來,8207在1.03至1.57上落,從未跌近0.75元的上市價,可見幕後或大戶甚為惜貨. 而且,三大股東之持股量高達72%,街貨量實在有限.

貨源極度歸邊

10. 最後,唔使問阿貴,做「大耳窿」一定係背景和實力雄厚之人士,尤其在內地,能做這種暴利生意的人,絕對唔簡單.

11. 隨著中央調控加劇,8207是罕有的「收水」國策受惠者,估計會愈來愈多大戶和老散青睞.現價上車,以2元為目標,潛在升幅50%.