強人入主 天行貨疏價揚

.

摘錄自 新報 2010-03-29

近期好多隻易手殼股都炒到飛起，當中應以天行國際（0993）最為落後，好大理由相信係同股權轉讓協議一直等候落實有關。而等足足三個幾月後，內地買家佳元集團終於在上周四與天行前大股東落實股權交易，佳元並將在21日內發出全面收購文件，象徵短期內應係天行開始發力狂追落後關鍵時刻，以圖表量度分析，中線應可以0.89元為目標。

炒內地金融平台概念

事實上，相對近期隻隻升到開巷易手殼股而言，天行國際真係好落後，自舊年底宣布易手予內地佳元集團後，股價一直未見大動，直至近日先重現突破。

場中所見，多條中資水均魚貫入場耐心收集。直至上周五，天行終於宣布，佳元已正式完成購入6.51億股天行股份之交易，每股作價0.22元，轉讓股份佔天行60.1%股權，而佳元將在21日內，發出全面收購的文件。

事實上，天行家陣市值只係4億幾銀，而貨源九成九都集中在強者手中，真正街外流通者，相信都係幾千萬貨仔而已。呢個亦可解釋到點解隻股在易手消息落實後，股價衝一小段時間就回順，查實之後低位成交小之又小。若買家要落場掃較大撼貨話，點都要挨近4毫邊先可有貨源供應也。

天行亦已在近期完成清理動作，早前股東特別大會已通過將旗下金業及證券業售回予原大股東張氏家族，新大股東進駐後，將繼續保留現有金融業，並擬首先強化香港業務，繼而擴充內地業務，並可能引進海外投資加強業務網絡，但整體仍以金融服務業為主，現時手頭資金超過3億銀，可以預期，天行料會發展成為內地金融平台，概念相當不俗。

值得留意係新進駐佳元集團側聞作風雖然低調，但係唔少內地大孖沙都積極埋身，睇來背景應唔簡單，股價料隨時起風雲。